سبحانك المعبود يا الوالي ولا غيرك ولي

سبحانك المعبود يا الوالي ولا غيرك ولي

 

الشاعر هتيل بن سعد الدوسري 

هذه القصيدة النبطيه الجزله والرائعه ابياتها للشاعر هتيل بن سعد الدوسري اجاد في مفردتها وفي الحمد والشكر لله على النعم وحقيقه تعتبر من القصائد النبطيه الرائعه والمتميزه صح لسان الشاعر ملايين كامل ابياتها درر نحمد الله على نعمة ظاهرها وباطنها .

***

باسم الكريم اللي كساني ثوب ستره واكتسيت
سبحانه المعبود والوالي ولا غيره ولي

اللي عطاني العافية واللي عطاني ما بغيت
واللي منحْني من فضايله الكثيرة ما يلي

الشكر لك والحمد لك وأنا بما تقسُم رضيت
يا اللي تفرّج كربتي والهم لا ضاقت علي

خلقتني من نطفةٍ حتى تمكّنت ونشيت
واوجدتني في أحسن التقويم شكل وهيكلي

تسعة شهورٍ عشتها في ظلمة البطن ولفيت
واقبلتْ للدنيا.. يديني من مطامعها خلي

ونمّيتني وقت الطفولة لين باقدامي مشيت
واعطيتني قوة شبابٍ( لا فني ولا بلي)

حفظتني واطعمتني واسقيتني حتى رويت
واعطيتني الخمس الحواس المعجزات الذُهّلِّي

كوّنتني واهدتيني درب الهُدى حتى اهتديت
وقسمت لي رزقٍ على طول الحياة يجّملي

وعلمتني بالعلم حتى اني تعلّمت وقريت
وشرحت صدري للشريعه والكتاب المنزلي

 

ويسّرت لي دين النبي الهاشمي له وانتميت
افضل نبي واشرف نبي وآخر نبيٍ مرسلي

وهبت لي مال وبنون ومجد من فضلك وصيت
وامّنتني في عيشتي وامّنت لي مستقبلي

وسهّلت لي عسر الأمور ومن فضايلك اغتنيت
لطفت بي واسعدتني فرّجت لي .يسّرت لي

تعفو وتصفح عن ذنوبي كل ما اخطيت و هفيت
يا كثر هفواتي وذنبي بين علمي واجهلي

أهفو وأغفل عنك واذنب وانت عني ما غفيت
تُعطي الذي يٌخطي وتعفو عنه وايضا تمهلي

تعلم بما يجري ولاغيرك ترّجيت ودعيت
ما لك شريكٍ ياعظيمٍ تُمهل ولاتهملي

تسمع دبيب النملة السوداء وتعلم ما نويت
محصي الشجر محصي البشر محصي النجوم الزحّلي

ياعالم ما في البحوروكل حي وكل ميت
عالم لغات الطير يا مُحيي العظام الهُمّلي

انت الرحيم انت اللطيف انت الخبير انت المُقيت
انت العزيز انت الغفور اللي تجير المبتلي

انت المُعزّ انت المٌذلّ انت العفو اللي عفيت
انت الشكور انت الحسيب انت الرقيب الأوّلي

انت السميع انت البصير انت الرؤوف اللي عطيت
انت الوكيل انت القويّ رحمن وامرك يحصلي

انت الودود انت الجليل انت الكبير اللي قضيت
المقتدر والمنتقم والرازق لغيري .ولي

انت البديع الخالق الباري تسمّيت وسميت
القادر الوهّاب والمتعال فوق المعتلي

انت المهيمن والغني والبرّ والعدل اعتليت
يا الباسط القابض يا وارث يا مجيبٍ يُسألي

رب السموات العُلى بديت باسمك وانتهيت
يالله عفوك يوم اروح القبر وافارق هلي

مالي سوى رحمتك يا ربي وفي وجهك لجيت
رحمتك يا ربي ولا جهدي ولا طيب اعملي

يارب يا تواب سامحني على ما قد جنيت
ذنبي إليكَ صاعد ُوخيرك إليًِِ نازلي

والله لو نظمت لي مليار في مليار بيت
في نعمةٍ وحده وفي خيرك وفي فضلك علي

إن ما اعتبر نفسي شكرت ولا مدحت ولا ثنيت
وانا الضعيف اللي بدونك لا مقام ولا صلي

هذا وباسمك خاتمتها مثل ما باسمك بديت
سبحانك المعبود يا الوالي ولا غيرك ولي

 

Facebook Twitter Google+ Pinterest Reddit StumbleUpon Linkedin Tumblr Google Bookmarks Email

عدد المقيّمين 0 وإجمالي التقييمات 0

1 2 3 4 5

أضف تعليقك على الموضوع

code
||